കൊല്ലപ്പെട്ട മാവോയിസ്റ്റുകളിൽ ഒരാളുടെ മൃതദേഹം കൂടി തിരിച്ചറിഞ്ഞു
![](https://www.newswings.online/wp-content/uploads/2019/03/mavoist.jpg)
അട്ടപ്പാടി മേലേ മഞ്ചക്കണ്ടി വനത്തില് നടന്ന ഏറ്റുമുട്ടലിൽ കൊല്ലപ്പെട്ട നാലു മാവോയിസ്റ്റുകളിൽ ഒരാളുടെ കൂടി മൃതദേഹം ബന്ധുക്കൾ തിരിച്ചറിഞ്ഞു. അരവിന്ദൻ എന്ന പേരിൽ സൂക്ഷിച്ചിരുന്ന മൃതദേഹം ചെന്നൈ സ്വദേശി ശ്രീനിവാസന്റേതെന്നാണ് തിരിച്ചറിഞ്ഞിരിക്കുന്നത്. ചെന്നൈയിൽ നിന്നെത്തിയ സഹോദരങ്ങളാണ് മൃതദേഹം തിരിച്ചറിഞ്ഞത്.
ശ്രീനിവാസനെ കുറിച്ച് ബന്ധുക്കൾക്ക് വ്യക്തമായ അറിവുണ്ടായിരുന്നില്ല. ഇയാൾ എട്ടു വർഷം മുമ്പ് വീടും നാടും ഉപേക്ഷിച്ച് പോയതാണ്. ചെന്നൈയിലെ സിപിഎം പ്രവർത്തകനായിരുന്നു ശ്രീനിവാസനെന്നും ബന്ധുക്കൾ പോലീസിനോട് പറഞ്ഞു. എന്നാൽ മൃതദേഹം ശ്രീനിവാസന്റേതെന്ന് ശാസ്ത്രീയമായി വ്യക്തത വരുത്താൻ ഡിഎൻഎ പരിശോധന ആവശ്യമാണ്. ഇതിനായി സഹോദരങ്ങളിൽ നിന്ന് രക്ത സാമ്പിൾ ശേഖരിച്ചിട്ടുണ്ട്.