അമിതഭാരം കയറ്റിയ ലോറിക്ക് ന്യൂഡല്‍ഹിയില്‍ 1.41 ലക്ഷം രൂപ പിഴ
ന്യൂഡല്‍ഹി: ട്രക്കില്‍ അമിതഭാരം കയറ്റിയതിന് ഒരു ട്രക്ക് ഉടമ ന്യൂഡല്‍ഹിയിലെ രോഹിണിയിലുള്ള കോടതിയില്‍ അടച്ചത് ഒന്നര ലക്ഷം രൂപയടുത്ത് പിഴ. സെപ്റ്റംബര്‍ ഒമ്പതിന് കോടതിയില്‍ പണം അടച്ച ചലാന്‍ രസീത് അനുസരിച്ച് 1,41,700 രൂപയാണ് രാജസ്ഥാനില്‍ നിന്നുള്ള ട്രക്ക് ഉടമ അടച്ചത്.
സെപ്റ്റംബര്‍ അഞ്ചിന് അമിതഭാരം കയറ്റിയ ട്രക്ക് പിടിച്ചു എന്നാണ് രേഖകളില്‍ നിന്ന് മനസ്സിലാകുന്നത്. ഭഗ്‍വാന്‍ റാം എന്നാണ് രസീതിലുള്ള പേര്. ഈ രസീത് ജഡ്‍ജി ഒപ്പിട്ട് അംഗീകരിച്ചിട്ടുമുണ്ട്. വാര്‍ത്താ ഏജന്‍സി എഎന്‍ഐ ആണ് ഫോട്ടോ പുറത്തുവിട്ടത്.
Delhi: A truck owner from Rajasthan paid challan amount of Rs 1,41,700 at Rohini court on September 9 for overloading the truck on September 5. pic.twitter.com/2P4G9JqDgR
— ANI (@ANI) September 10, 2019
രാജ്യത്തെ ട്രാഫിക് നിയമങ്ങള്‍ സെപ്റ്റംബര്‍ ആദ്യം മുതല്‍ കര്‍ശനമാക്കിയിരുന്നു. വിവിധ ട്രാഫിക് നിയമലംഘനങ്ങള്‍ക്കുള്ള ശിക്ഷ കഠിനമാക്കുകയും പിഴ ഉയര്‍ത്തുകയും ചെയ്‍തു. വിവിധ സംസ്ഥാനങ്ങളില്‍ ഇത് വിവാദവുമായി.
കേരളത്തില്‍ സിപിഎം തീരുമാനം എതിര്‍ക്കുകയാണ്. പക്ഷേ, എല്‍ഡിഎഫ് സര്‍ക്കാര്‍ തീരുമാനങ്ങള്‍ കര്‍ശനമാക്കിയിരുന്നു. ട്രാഫിക് സുരക്ഷ കരുതിയാണ് കര്‍ശന നിയമങ്ങള്‍ എന്നാണ് കേന്ദ്രസര്‍ക്കാര്‍ വ്യക്തമാക്കുന്നത്.
രാജ്യത്തിന്‍റെ വിവിധ ഭാഗങ്ങളില്‍ നിന്ന് ഇതിനോടകം തന്നെ കനത്ത പിഴ ലഭിച്ച വാര്‍ത്തകള്‍ വന്നു കഴിഞ്ഞു. പ്രതിഷേധത്തെ തുടര്‍ന്ന് ഗുജറാത്തില്‍ സംസ്ഥാനസര്‍ക്കാര്‍ പിഴയില്‍ ഇളവുകള്‍ വരുത്തിയിരുന്നു.
