മലയാളികൾക്ക് ഓണാശംസകൾ നേർന്ന് ന്യൂസീലാൻഡ് പ്രധാനമന്ത്രി
വില്ലിങ്ടൺ: കേരളത്തോടൊപ്പം ലോകമെമ്പാടുമുള്ള മലയാളികള്‍ ഓണം ആഘോഷിക്കുമ്പോള്‍ ആശംസകള്‍ നേര്‍ന്ന് ന്യൂസിലൻഡ് പ്രധാനമന്ത്രി. ന്യൂസിലൻഡിലെ മലയാളി സമൂഹത്തിന് ഓണാശംസകള്‍ നേരുന്നതായി പ്രധാനമന്ത്രി ജസീന്ത ആര്‍ഡേൺ ഫേസ്ബുക്ക് വീഡിയോയിലൂടെ അറിയിച്ചു. ന്യൂസിലൻഡ് പാര്‍ലമെന്‍റ് അംഗവും ഇന്ത്യൻ വംശജയുമായ പ്രിയങ്ക രാധാകൃഷ്ണനൊപ്പമാണ് പ്രധാനമന്ത്രി ഓണാശംസ നേര്‍ന്നത്.
https://www.facebook.com/priyancanzlp/videos/528595431046699/
സന്തോഷത്തോടെയും സമാധാനത്തോടെയും എല്ലാ കുടുംബങ്ങളും ഓണം ആഘോഷിക്കണമെന്നും ന്യൂസിലൻഡിലെ മലയാളി സമൂഹത്തിന് ഓണാശംസകള്‍ നേരുന്നുവെന്നും അവര്‍ പറഞ്ഞു. രാജ്യത്തെ ഏറ്റവും പഴക്കമുള്ള പ്രവാസി കൂട്ടായ്മകളിലൊന്നായ മലയാളി സമാജത്തിനും അവര്‍ ആശംസകള്‍ നേര്‍ന്നു. ന്യൂസിലാൻഡ് അടക്കം വളരെയേറെ മലയാളികള്‍ കുടിയേറി താമസിക്കുന്ന വിദേശരാജ്യങ്ങളിലും വിപുലമായ ഓണാഘോഷങ്ങള്‍ അരങ്ങേറുന്ന പശ്ചാത്തലത്തിലാണ് ജസീന്ത ആര്‍ഡേന്‍റെ ഓണാശംസ.
ന്യൂസിലാൻഡിന്‍റെ 40-ാം പ്രധാനമന്ത്രിയും ലേബര്‍ പാര്‍ട്ടി നേതാവുമായ ജസീന്ത ആര്‍ഡേണ് രാജ്യത്തെ ന്യൂനപക്ഷ വംശജരോടും കുടിയേറ്റ സമൂഹത്തോടും അനുഭാവപൂര്‍ണ്ണമായ സമീപനമാണുള്ളത്. ന്യൂസിലാൻഡിലെ ക്രൈസ്റ്റ്ചര്‍ച്ചിലെ മുസ്ലീം പള്ളിയിൽ നടന്ന തീവ്രവാദ ആക്രമണത്തിന്‍റെ ഇരകളോട് ഐക്യദാര്‍ഢ്യം പ്രഖ്യാപിച്ച് ഹിജാബ് ധരിച്ചെത്തുകയും ദുരന്തത്തിന്‍റെ ഇരകളെ ആശ്വസിപ്പിക്കുകയും ചെയ്ത ജസീന്ത ആര്‍ഡേണിന്‍റെ ദൃശ്യങ്ങള്‍ ആഗോളശ്രദ്ധ പിടിച്ചു പറ്റിയിരുന്നു.
