ഭീകരാക്രമണ സന്ദേശം വ്യാജം ; കേരളം ഉൾപ്പടെ 8 സംസ്ഥാനങ്ങൾ ആശ്വാസത്തിൽ
കേരളം ഉൾപ്പെടെ എട്ടു സംസ്ഥാനങ്ങളിൽ ഭീകരാക്രമണമുണ്ടാകുമെന്ന സന്ദേശം വ്യാജമെന്ന് സ്ഥിരീകരിച്ച് ബംഗളൂരു പോലീസ്. വ്യാജ സന്ദേശം അയച്ചയാളെ പോലീസ് പിടികൂടി. ബംഗളൂരു ആവലഹള്ളി സ്വദേശി സ്വാമി സുന്ദരമൂർത്തിയാണ് അറസ്റ്റിലായത്. വിരമിച്ച സൈനികനാണ് സ്വാമി സുന്ദരമൂർത്തി.
ഇയാൾ ഇപ്പോൾ ലോറി ഡ്രൈവറാണ്. ബംഗളൂരു സിറ്റി പോലീസിന് വെള്ളിയാഴ്ച്ച വൈകുന്നേരമാണ് ഫോണിലൂടെ ഭീകരാക്രമണ സന്ദേശം ലഭിച്ചത്. കേരളത്തിന് പുറമേ തമിഴ്നാട്, കര്ണാടക, ആന്ധ്രാപ്രദേശ്, ഗോവ, പുതുച്ചേരി, മഹാരാഷ്ട്ര, തെലങ്കാന സംസ്ഥാനങ്ങളിലാണ് ഭീകരാക്രമണ ഭീഷണിയുണ്ടായത്.
ഇതേ തുടർന്ന് കര്ണാടക പോലീസ് മേധാവി മറ്റുസംസ്ഥാനങ്ങളിലെ പോലീസ് മേധാവികള്ക്ക് ജാഗ്രതാ നിര്ദേശം നല്കി. ഭീകരാക്രമണ മുന്നറിയിപ്പിനെ തുടർന്ന് സുരക്ഷാ സംവിധാനങ്ങൾ ശക്തമാക്കാൻ ഡിജിപി ലോക്നാഥ് ബെഹ്റ ജില്ലാ പോലീസ് മേധാവികൾക്ക് നിർദേശം നൽകിയിരുന്നു.