നടുവിൽ സ്ഫോടനം ; ആർഎസ്എസ് നേതാവ് ഒളിവിൽ
നടുവിൽ കിഴക്കേമലയിൽ ഉണ്ടായ ബോംബ് സ്ഫോടനത്തിൽ ആർഎസ്എസ് തളിപ്പറമ്പ് കാര്യവാഹക് ഷിബു മുതിരമല ഒളിവിൽ.ഇയാളുടെ വീട്ടിൽ സൂക്ഷിച്ചിരുന്ന ബോംബാണ് കഴിഞ്ഞ ദിവസം പൊട്ടിത്തെറിച്ചത്.സ്ഫോടനത്തിൽ 2 വിദ്യാർത്ഥികൾക്ക് പരിക്കേറ്റിരുന്നു.പോലീസ് ഇയാൾക്ക് വേണ്ടി അന്വേഷണം ശക്തമാക്കിയിട്ടുണ്ടെങ്കിലും ഇതുവരെ പിടികിട്ടിയിട്ടില്ല.
വീട്ട് മുറ്റത്ത് കളിച്ചുകൊണ്ടിരുന്ന ഷിബുവിന്റെ മകനും കൂട്ടുകാരനുമാണ് സ്ഫോടനത്തിൽ പരിക്കുപറ്റിയത്.ഇരുവരും പരിയാരം മെഡിക്കൽ കോളേജിൽ ചികിത്സയിലാണ്.ഇവരുടെ മൊഴിയും പോലീസ് രേഖപ്പെടുത്തി.
സ്ഫോടനം നടന്ന സ്ഥലത്തുനിന്ന് ആയുധശേഖരവും ബോംബ് നിർമാണത്തിന് ഉപയോഗിക്കുന്ന 2,350 ഗ്രാം അലുമിനിയം പൗഡർ, 75 ഗ്രാം ഗൺ പൗഡർ തുടങ്ങിയവയും കണ്ടെത്തിയിരുന്നു. തെരഞ്ഞെടുപ്പ് സമയത്ത് നടന്ന സ്ഫോടനവും ആയുധശേഖരം കണ്ടെത്തിയതും പോലീസ് അതീവ ഗൗരവത്തോടെയാണ് അന്വേഷിക്കുന്നത്.
തെരഞ്ഞെടുപ്പ് ലക്ഷ്യമാക്കിയാണ് ബോംബ് നിർമാണമെന്നാണ് പോലീസിന് ലഭിച്ച പ്രാഥമിക വിവരം. കുടിയാന്മല എസ്ഐ പി. പ്രമോദിന്റെ നേതൃത്വത്തിലാണ് അന്വേഷണം പുരോഗമിക്കുന്നത്.