കൊവിഡ് 19: പ്രവാസികളെ തിരിച്ചെത്തിക്കണമെന്ന ഹര്ജി സുപ്രീംകോടതി ഇന്ന് പരിഗണിക്കും
ന്യൂഡല്‍ഹി: ഗള്‍ഫ് നാടുകളില്‍ അകപ്പെട്ട പ്രവാസികളെ തിരിച്ചെത്തിക്കണമെന്നും രോഗം ബാധിച്ചവര്‍ക്ക് ആവശ്യമായ ചികിത്സയും ഭക്ഷണവും ഉറപ്പാക്കണമെന്നും ആവശ്യപ്പെട്ടുള്ള ഹര്‍ജികള്‍ സുപ്രീംകോടതി ഇന്ന് പരിഗണിക്കും. പ്രവാസി ലീഗല്‍ സെല്‍, എം കെ രാഘവന്‍ എം പി ഉള്‍പ്പടെയുള്ളവര്‍ നല്‍കിയ ഹര്‍ജികളാണ് പരിഗണിക്കുക.
ചീഫ് ജസ്റ്റിസ് അദ്ധ്യക്ഷനായ ബെഞ്ച് വീഡിയോ കോണ്‍ഫറന്‍സിംഗ് വഴിയാണ് ഹര്ജി പരിഗണിക്കുന്നത്.
വിസിറ്റിംഗ് വീസയിലും ടൂറിസ്റ്റ് വീസയിലുമൊക്കെ പോയ നിരവധി പേരാണ് കൊവിഡ് 19 വൈറസിന്റെ വ്യാപനം മൂലം ഗള്‍ഫ് നാടുകളില്‍ കുടുങ്ങിക്കിടക്കുന്നത്. ഇതിനുപുറമെ ആയിരക്കണക്കിന് ഇന്ത്യക്കാര്‍ രോഗബാധിതരായും ദുരിതമനുഭവിക്കുകയാണ്. അതേസമയം രോഗമില്ലാത്തവരെ തിരിച്ചെത്തിക്കാന്‍ പ്രത്യേക വിമാനം അയക്കണമെന്നും ഹര്‍ജിയില്‍ ആവശ്യപ്പെട്ടിട്ടുണ്ട്.
