പൊലീസിനും സര്‍ക്കാരിനും രൂക്ഷ വിമര്‍ശനവുമായി കെ സുരേന്ദ്രന്‍
ശബരിമലയ വിഷയത്തില്‍ സര്‍ക്കാര്‍ പ്രകോപനം ഉണ്ടാക്കിക്കൊണ്ടിരിക്കുയാണെന്നും ഈ നിലയിലാണ് മുന്നോട്ടുപോകുന്നതെങ്കില്‍ തങ്ങള്‍ക്ക് നിയമം കയ്യിലെടുക്കേണ്ടി വരുമെന്നും ബി.ജെ.പി നേതാവ് കെ. സുരേന്ദ്രന്‍. പൊലീസിന്റെ സന്നാഹങ്ങളുമായാണ് യുവതികള്‍ മല കയറിയിരിക്കുന്നത്. ഗുരുതരമായ തെറ്റാണ് ഐ.ജി ശ്രീജിത്തിന്റെ ഭാഗത്ത് നിന്നും ഉണ്ടായത്. പൊലീസ് ആക്ഷന്‍ സെക്ഷന്‍ 43 ഐ.ജി ശ്രീജിത്തിന് അറിയില്ലെന്നാണോ?
പൊലീസിന്റെ വേഷവും ഉപകരണവും യുവതികള്‍ക്ക് നല്‍കിയത് എന്ത് അടിസ്ഥാനത്തിലാണെന്ന് കെ സുരേന്ദ്രന്‍ ചോദിച്ചു. ആചാരലംഘനം നടത്താന്‍ പൊലീസ് കൂട്ട് നിന്ന ശേഷം കടകംപള്ളി സുരേന്ദ്രന്‍ ഇരട്ടത്താപ്പ് കാണിച്ചു. മനപൂര്‍വ്വം പ്രകോപനം ഉണ്ടാക്കുകയാണ് സര്‍ക്കാരെന്ന് കെ സുരേന്ദ്രന്‍ ആരോപിച്ചു. അത്തരം സാഹചര്യത്തില്‍ നിയമ കയ്യിലെടുക്കേണ്ടി വരും.
ശബരിമലയുടെ പരിശുദ്ധി തകര്‍ക്കാന്‍ ശ്രമിക്കുന്നു. മതവികാരം വ്രണപ്പെടുത്താന്‍ ശ്രമിച്ചാല്‍ ശക്തമായ പ്രതിഷേധമുണ്ടാവുമെന്നും സുരേന്ദ്രന്‍ മുന്നറിയിപ്പ് നല്‍കുന്നു. യുവതി പ്രവേശം സാധ്യമാകാന്‍ സര്‍ക്കാര്‍ ഗൂഡാലോചന നടത്തുന്നുവെന്നും സുരേന്ദ്രന്‍ ആരോപിച്ചു.
