ശൈലജ ടീച്ചര്‍ ഉരുക്കുവനിത; മന്ത്രിയെ അഭിനന്ദിച്ച് ഡോക്ടര്‍ അനൂപ്
ഒരു പനി മൂലം കേരളം മുഴുവന്‍ വിറങ്ങലിച്ചു നിന്ന ദിവസങ്ങളാണ് കടന്നു പോയത്. നിപയെ ക്രിയാത്മകമായ ഇടപെടലിലൂടെയാണ് സര്‍ക്കാര്‍ പരാജയപ്പെടുത്തിയത്. ഡോക്ടര്‍മാരും മറ്റ് ജീവനക്കാരും ജീവന്‍ പണയം വച്ചാണ് നിപയെ തുരത്തിയത്. അതേ സമയം അതിനെല്ലാം ചുക്കാന്‍ പിടിച്ച ആരോഗ്യമന്ത്രി കെകെ ശൈലജയുടെ പ്രവര്‍ത്തനങ്ങളെ പ്രതിപക്ഷപാര്‍ട്ടികള്‍ പോലും അഭിനന്ദിച്ചിരുന്നു. മന്ത്രിയെ അഭിനന്ദിച്ച് നിപ്പായെ പ്രതിരോധിക്കാന്‍ മുന്നിലുണ്ടായിരുന്ന ഡോക്ടര്‍ അനൂപ് കുമാര്‍ എ.എസ് എഴുതിയ കുറിപ്പ് വൈറലായി.
ചെറിയ കാര്യങ്ങളിലുള്ള ശ്രദ്ധയും യുക്തമായ തീരുമാനങ്ങളും, സ്നേഹം നിറഞ്ഞ പെരുമാറ്റവും കൊണ്ട് ഒരു ഝാന്‍സി റാണിയെ പോലെ സംഘത്തെ നയിച്ചു ഒരു അസാമാന്യ പക്വത കാണിച്ച വ്യക്തിയാണ് ശൈലജ ടീച്ചറെന്ന് ഡോ: അനൂപ് കുറിച്ചു. കോഴിക്കോട് ബേബി മെമ്മോറിയല്‍ ആശുപത്രിയിലെ ക്രിട്ടിക്കല്‍ കെയര്‍ വിഭാഗം മേധാവിയാണ് അദ്ദേഹം.
ഫെയ്‌സ്ബുക്ക് പോസ്റ്റിന്റെ പൂര്‍ണരൂപം
ബഹുമാനപ്പെട്ട ആരോഗ്യ മന്ത്രി… K K Shylaja teacher.
ഒരു രാഷ്ട്രീയക്കാരിയും, ഭരണ കർത്താവും എങ്ങനെ ആകണം എന്നതിന്റെ ഉത്തമ ഉദാഹരണം… The iron lady… വിഷയങ്ങൾ പഠിക്കുന്നതിലും, മനസിലാകുന്നതിനുമുള്ള കഴിവ് എന്നെ വളരെയധികം അത്ഭുതപ്പെടുത്തി, ചെറിയ കാര്യങ്ങളിലുള്ള ശ്രദ്ധയും യുക്തമായ തീരുമാനങ്ങളും, സ്നേഹം നിറഞ്ഞ പെരുമാറ്റവും കൊണ്ട് ഒരു ജാൻസി റാണിയെ പോലെ സംഘത്തെ നയിച്ചു ഒരു അസാമാന്യ പക്വത കാണിച്ചു… ചങ്കൂറ്റത്തോടെഎല്ലാ കാര്യങ്ങളും മനസിലാക്കി അവതരിപ്പിക്കുന്ന കഴിവ് തികച്ചും അത്ഭുതമുളവാക്കുന്നതായിരുന്നു. Nipah രോഗം വരുമെന്ന പേടിപോലും ഇല്ലാതെ.. ഒരു ശക്തയായ സേനാപതി നമുക്കുണ്ടായതിൽ അഭിമാനം കൊള്ളുന്നു… ഈ ലോകം മുഴുവനും ആ മഹത് വ്യക്തിയോട് കടപ്പെട്ടിരിക്കുന്നു.
