രാജ്യദ്രോഹകുറ്റം ; കനയ്യ കുമാറിനെതിരെ 1200 പേജുള്ള കുറ്റപത്രം സമർപ്പിച്ചു…
ജവഹർലാൽ നെഹ്റു സർവകലാശാലയിലെ (ജഐൻയു) മുൻ വിദ്യാർഥി യൂണിയൻ പ്രസിഡന്റ് കനയ്യ കുമാറിനെതിരായ രാജ്യദ്രോഹക്കേസിൽ ഡൽഹി പോലീസ് കുറ്റപത്രം സമർപ്പിച്ചു. 1200 പേജുള്ള കുറ്റപത്രം പട്യാല കോടതിയിലാണ് സമർപ്പിച്ചത്.
കനയ്യ കുമാർ, ഉമർ ഖാലിദ്, അനിർബൻ ഭട്ടാചാര്യ തുടങ്ങി ഒന്പതു പേർക്കെതിരേയാണ് കുറ്റപത്രം തയാറാക്കിയിരിക്കുന്നത്. രാജ്യദ്രോഹത്തിനു പുറമേ ക്രിമിനൽ ഗൂഢാലോചനയും കള്ളരേഖ ചമയ്ക്കൽ ഉൾപ്പെടെയുള്ള കുറ്റങ്ങളും പോലീസ് ചുമത്തിയിട്ടുണ്ട്. കുറ്റപത്രം കോടതി ചൊവ്വാഴ്ച പരിഗണിക്കും.
പാർലമെന്റ് ആക്രമണക്കേസിലെ മുഖ്യസൂത്രധാരൻ അഫ്സല് ഗുരുവിന് ജെഎൻയുവില് അനുസ്മരണം നടത്തിയ ചടങ്ങിൽ ദേശവിരുദ്ധ മുദ്രാവാക്യം മുഴക്കിയെന്ന് ചൂണ്ടിക്കാട്ടിയാണ് കനയ്യ കുമാർ ഉൾപ്പെടെയുള്ളവർക്കെതിരേ പോലീസ് കേസെടുത്തിരുന്നത്. 2016 ഫെബ്രുവരി ഒന്പതിനായിരുന്നു സംഭവം.