ഇന്ത്യയുടെ രണ്ടാമത്തെ ചാന്ദ്രദൗത്യമായ ചന്ദ്രയാൻ-രണ്ടിന്‍റെ വിക്ഷേപണം വീണ്ടും മാറ്റി. ചന്ദ്രയാൻ-2 മാർച്ച് 25നോ ഏപ്രിൽ അവസാനമോ വിക്ഷേപിക്കുമെന്ന് ഐഎസ്ആർഒ ചെയർമാൻ കെ. ശിവൻ പറഞ്ഞു.

ചന്ദ്രയാൻ-2 2018ൽ വിക്ഷേപിക്കാനായിരുന്നു ഐഎസ്ആർഒ പദ്ധതിയിട്ടിരുന്നത്. പിന്നീട് വിക്ഷേപണം ജനുവരി മൂന്ന് മുതൽ ഫെബ്രുവരി 16 വരെയുള്ള വിൻഡോയിലേക്ക് മാറ്റിയിരുന്നു.

നേരത്തെ ചന്ദ്രയാന്‍ ഒന്നിലൂടെ ആദ്യത്തെ ചന്ദ്രയാത്ര പേടകത്തെ വിക്ഷേപിച്ച് ഇസ്രോ ചരിത്രത്തിലിടം പിടിച്ചിരുന്നു. ചന്ദ്രയാന്‍ രണ്ടിലൂടെ ബഹിരാകാശ രംഗത്ത് പുതിയ നേട്ടങ്ങള്‍ സ്വന്തമാക്കാനാണ് ഇന്ത്യ ലക്ഷ്യമിടുന്നത്.

ചന്ദ്രന്‍റെ ഉപരിതലത്തിലെ ഭൗമശാസ്ത്രപരമായ പ്രത്യേകതകളെ കൃത്യമായി പഠിക്കുക എന്ന ലക്ഷ്യത്തോടെയാണ് ചന്ദ്രയാന്‍ ഒന്ന് വിക്ഷേപിച്ചത്. ചന്ദ്രന്‍റെ ഉപരിതലത്തില്‍ ജലമുണ്ടെന്ന കണ്ടെത്തല്‍ ചാന്ദ്രയാൻ ഒന്നിന്‍റേതായിരുന്നു.

ലോകത്തുള്ള എല്ലാ ബഹിരാകാശ ശാസ്ത്രജ്ഞരും ശ്രദ്ധിക്കുന്ന സ്ഥലമാണ് ചന്ദ്രന്‍റെ ദക്ഷിണ ധ്രുവം. ഇവിടെത്തെ കാര്യങ്ങൾ കൃത്യമായി മനസിലാക്കാൻ ശാസ്ത്രലോകത്തിന് ഇതുവരെ കഴിഞ്ഞിട്ടില്ല. ഇവിടെ പ്രത്യേക പഠനത്തിന് സാധിക്കുന്ന വിധത്തിലാണ് ചന്ദ്രയാൻ രണ്ട് നിർമിച്ചിരിക്കുന്നത്.