ഒരു രൂപ നഷ്ടപരിഹാരം ആവശ്യപ്പെട്ട് മാനനഷ്ടകേസ്
മീ ടൂ ക്യാംപയിനിൽ തനിക്കെതിരെ ലൈംഗികാരോപണം ഉന്നയിച്ച തിരക്കഥാകൃത്തും നിർമാതാവുമായ വിന്റ നന്ദക്കെതിരെ മാനനഷ്ട കേസ് നൽകി ബോളിവുഡ് ചലച്ചിത്ര നടൻ അലോക് നാഥ്. മാനനഷ്ട തുകയായി ഒരു രൂപയാണ് അലോക് നാഥ് ആവശ്യപ്പെട്ടത്. വിന്റ നന്ദ മാപ്പെഴുതി നൽകണമെന്നും അദ്ദേഹം ആവശ്യപ്പെട്ടു.
ലൈംഗികാരോപണം ഉന്നയിച്ച് ഭർത്താവിനെ അപകീർത്തിപ്പെടുത്തിയതിന് വിന്റ നന്ദക്കെതിരെ അന്വേഷണം ആവശ്യപ്പെട്ട് അലോക് നാഥിന്റെ ഭാര്യ ആശു അന്ധെരി നേരത്തെ കോടതിയെ സമീപിച്ചിരുന്നു.
കഴിഞ്ഞ ആഴ്ച ഫേസ്ബുക്ക് പോസ്റ്റിലൂടെയാണ് വിന്റ നന്ദ 19 വർഷം മുമ്പ് അലോക്നാഥ് തന്നെ ലൈംഗിക പീഡനത്തിന് ഇരയാക്കിയതായി വെളിപ്പെടുത്തിയത്. കേവലം ബലാത്സംഗമായിരുന്നില്ല, എന്റെ വീട്ടിൽ വെച്ച് ഇൻഡസ്ട്രിയിലെ ഏറ്റവും മാന്യനായ വ്യക്തി എന്നറിയപ്പെടുന്ന ആൾ തന്നെ മൃഗതുല്യമായി പീഡിപ്പിക്കുകയായിരുന്നുവെന്നായിരുന്നു വിന്റയുടെ വെളിപ്പെടുത്തൽ.
അലോകിന്റെ വീട്ടിൽ ഒരുക്കിയ ഒരു പാർട്ടിയിലേക്ക് തന്നെ ക്ഷണിക്കുകയും മദ്യത്തിൽ മയക്കു മരുന്ന് ചേർത്ത് നൽകിയ ശേഷം തന്നെ തന്റെ വീട്ടിലെത്തിച്ച് ക്രൂരമായ പീഡനത്തിന് ഇരയാക്കുകയായിരുന്നുവെന്നുമാണ് വിന്റ ഫേസ്ബുക്കിൽ കുറിച്ചത്. സംഭവത്തിന് ശേഷം അലോക് നാഥിന്റെ സീരിയലിൽ നിന്നും പുറത്താക്കിയാതായും പോസ്റ്റിൽ വിന്റ വ്യക്തമാക്കി.
തൊണ്ണൂറുകളിൽ പ്രസിദ്ധമായിരുന്ന ‘താര’ എന്ന ടെലിസീരിയലിന്റെ എഴുത്തുകാരിയും നിർമാതാവുമായിരുന്നു വിന്റ നന്ദ. വെളിപ്പെടുത്തലിനു പിന്നാലെ അലോക് നാഥിനെതിരെ ബോളിവുഡ് നടി സന്ധ്യ മൃദുലും പേരു വെളിപ്പെടുത്താതെ ഒരു ഡിസൈനറും ലൈംഗികാരോപണവുമായി രംഗത്ത് വന്നിരുന്നു.